هذه الصفحة مخصصة لـ كريم عربجي 
الشاب ما بنعرفه يعني، بس إله علينا كثيييييير
كان متحملنا بأخوية، كل المسبات والحكي والقدح ضمن المنبر الحر، المهم الشباب ضبوا للشاب، وصار ببيت خالته.
* الصورة نقلاً عن رابط معلومات حقوق الإنسان في سوريا
ننشر هنا بين الفينة والأخرى بعضاً من روائع كريم… وهذه إحداها
مرحبا شبيبة
بيجوز هاليومين يعزموني جماعة صحابي (هنن مو كتير صحابي … بالحقيقة انا ما بعرفهم و هنن ما بيعرفوني غير من التقارير يللي الله يكسر ايدين يللي عم يكتبها) على سينما بيت خالتي احضر هنيك فيلم “نجوم الضهر” المشهور (بالالوان)
بتعرفوها للسينما ما هيك ؟؟؟
سابع قبو بعد جهنم الحمرا .. فرع فلسطين
لهلأ ما بعرف شو هيي التهمة … بس بيقولوا انو محضرينلي يا ها من قبل ما اخلق
مشان هيك … قررنا مع ادارة اخوية انو نتخذ بعض الاجراءات الاحترازية في حال ضبوني الشباب ببيت خالتي
و اللي ما بيحسب ما بيسلم
باعتبار انو انا مراقب المنبر الحر، و مشرف اداري…
قررت الادارة انو ازا صار ما صار … ينحذف حسابي من منصة المشرفين
يعني ازا صار ما صار … رح يكون في مراقبين جداد ع المنبر
و بتمنى من ياس انو يوافق على استلام المنبر
هلأ لحتى كون منصف … في شبين مخضرمين (رفضوا ذكر اسماءهم) واصل البل لدقنهم قبل ما يوصللي
و في شبين قدما كتير كانوا بيناتنا من زمان و تركونا هدول مشي حالهم بلش الفيلم تبعهم يوم الخميس الماضي
بس ما فيي احكي اكتر لأنو لسا مو مبين شي
و انشالله هاليومين بيتوضح كل شي و انشالله خير
هلأ وصيتي الكم (تقرأ في حال تعبّينا)
للملحدين…
يا ملحدين
يا كفرة
يللي ما تعرفوش ربنا
اذكرونا بالخير كل ما تسمعوا فيروز و مارسيل خليفة
للمؤمنين…
ادعولنا شباب و صبايا
ادعولنا الله يشيل عنا و عنكم و عن حبابكم
ادعولنا الله يتوه طريقهم و ما يعرفولنا طريق
لجماعة المعارضة
عباية يا شباب عباية
و خصوصي بنوتة عيونا زرقا … خراس و سد بوزك هالكام يوم، الشغلة مو عنترة … لازم حدا يضل برا مشان يتابع الاخبار
لجماعة الموالاة
لك نيالكم ما اهنا بالكم
للمشرفين:
انتوا احلى عيلة ممكن حدا يتعرف عليها
خليكم ايد وحدة متل ما بعرفكم
للحكيم:
لا تواخزنا خيو … وجعنالك راسك
شكرا جزيلا على مساحة الحرية يللي وفرتها للشباب و الصبايا
و سامحني على اخطائي و ازا خيبت املك
لك دخيل رب سوريا ما احلاها
amarta
و دمتم للحرية
كان الي احتكاكات طفيفة كتير معه عبر الانترنت .. لا تذكر يعي
بس بعد ما اعتقل .. صرت حبه .. وصدقني وقت قلك اني .. مشتقله
By: gabriel on 2009/04/04
at 11:45 ص
[...] (الأحد 13/9/2009) عن محكمة أمن الدولة فاقدة الشرعية بحق كريم عربجي. وقال الناطق الإعلامي باسم اللجنة السورية لحقوق [...]
By: الحكم على المدون كريم أنطوان عربجي بالسجن ثلاث سنوات « رايح ومش راجع on 2009/09/13
at 12:40 م